ދިވެހި ޤައުމުގެ ދިރުމަކީ ދިވެހި ޒުވާނުންނެވެ.

ގަހެއް ފޯދި އެގަހެއްގައި މޭވާ އަޅާ ތާޒާ ވަނީ އެގަހެއްގެ ޒުވާން އުމުރުގައެވެ. ނުފޯދޭ ގަހެއްގައި މޭވާ އަޅާ ދޮންވެ ފައްކާވުމަކީ މުސްތަހީލް ކަމެކެވެ. އަދި ހަމައެހެންމެ މޭވާ އަޅާތާ ގިނަދުވަސް ވެފައިވާ ގަހެއްގައި މޭވާ އެޅުމަކީވެސް ނާދިރު ކަމެކެވެ. ވުމާއެކު ގަސްގަހާގެހީގެ ޖީލްދެމިގެން ދިޔުމަށްޓަކައި އެތަކެތީގެ ޒުވާން ޖީލްގެ އަހައްމިއްޔަތުކަން ނުހަނު ބޮޑެވެ. ހަމަ މިބީދައިން ޤައުމެއް އެޤައުމެއްގެ ރާސްތާގައި ކުރިއަށް ދިޔުމަށްޓަކައި ޒުވާނުންގެ ބޭނުން ނުހަނު ބޮޑުކަން ކަށަވަރެވެ. ވުމާއެކު ޒުވާނުންނަކީ ދިވެހި ޤައުމުގެ ދިރުން ކަމުގައި ދަންނަވަން ޖެހެއެވެ.

ޒުވާނުންނާ ނުލައި ޤައުމެއް އެޤައުމެއްގެ އެންމެ ހަލުވި ދުވެލީގައި ކުރިއަށް ފައި އެޅުމަކީ ވަރަށް ދަތި އުނދަގޫ ކަމެކެވެ. މުސްކުޅިވެ ބާރުދެރަވެފައިވާ ސިކުނޑިއަކަށް ވުރެ ހެދެމުން ހަރުވަމުން އަންނަ ސިކުނޑިއެއްގެ ވިސްނުމުގެ ބާރު ގަދަވާނެކަމީ އެއްވެސް މީހަކު ދެބަސްވާނެ ކަމެއް ނޫންކަން ކަށަވަރެވެ. ފޮޅިފައިވާ މަލަކަށް ވުރެ ފޮޅެމުން އަންނަ މާމަލުގެ ވަސް ގަދަވާ ބީދައިންނެވެ. މިފަދަ ތާޒާ ފޮނި ހިޔާލާ ވިސްނުމާއި ފިކުރުގެ ބޭނުން ޤައުމު ހިނގުމުގައި ބޭނުން ކުރެވިއްޖެ ނަމަ ތަރައްޤީގެ މަގުގައި އިތުރު ހަރުފަތެއް ގިރާކުރުމުގެ ރާސްތާ ހުޅުވިގެންދާ ނެކަމީ ކަށަވަރުވެ ޔަގީން ވާކަމެކެވެ. އެހެންކަމުން ގައުމުގެ ކުރިއެރުމަކީ ޒުވާނުންގެ ކުރިއެރުމެވެ.

މަތިވެރި ހުސްވެފައިވާ ރުކަކުން މިރި، ގޮބޮޅި،އަދި ކާށި ލިބުމަކީ މުސްތަހީލް ކަމަކަށް ވީފަދައިން  ދިވެހި ޒުވާނުން ނާ ނުލައި ހަރުދަނާ ތަރުބަވީ ޖީލެއް ބިނާކުރުމީ ދަތިއުނދަގޫ ކަމެކެވެ. މިކަމަކީ މުސްތަޤުބަލުގައި ޤައުމު ޤައުމެއްގެ ގޮތުގައި ދެމިއޮތުމަށް ބޭނުންވާނެ އެންމެ މުހިއްމު އެއްބަހާއެވެ. މުޖުތަމަޢު މުޖުތަމަޢެއްގެ ގޮތުގައި އޮތުމަށް ހަރުދަނާ އިސްލާމީ އަޚްލާގުން ފޭރާ ލެވިފައިވާ ޖީލެއް ބިނާކުރުމަށް ދިވެހި ޒުވާނުންގެ ދައުރު ވާރަށް ބޮޑެވެ. ވުމާއެކު ދިވެހި ޒުވާނުން ވެގެން ދަނީ ދިވެހި ގައުމުގެ ކުރިމަގު ކަމުގައެވެ.

އުނގަންނާ ދިނުމާއި އޮޅުންފިލުވައި ދިނުމުގައި މިހާރު މިވަނީ ޒުވާނުންގެ އަހައްމިއްޔަތުކަން އިންތިހާއަށް ބޮޑުވެފައެވެ. ޤައުމުގެ ހާލުގެ ދުލުން ޒުވާނުންނަށް އެދި ގޮވަނީއެވެ. ޒުވާން ސިކުނޑިތަކަކަށް އެދިއެދި ތިބި އެތައް ދަރިވަރުންނެއް މިއަދު ތިބިކަމީ ފާހަގަ ކުރަންޖެހޭ އެއްހަޤީޤަތެވެ. މިފަދަ ކަންކަމީ ޒުވާން ސިކުނޑިތަކެއްގެ އުފެއްދުންތެރި ޚިޔާލާ ނުލާ ފަޅު ނުފިލާނެ ކަންތައްކަން ކަށަވަރެވެ. ތައުލީމީ ތަރުބަވީ މަންހަޖައް ބިނާކުރުވަނިވި ތަފާތު ބޮޑު އިންގިލާބެއް ގެންނަން ޖެހިފައވާ މިފަދަ ދުވަސް ވަރެއްގައި ޒުވާނުންނާ ނުލައި އެކަން ކޮށްފިނަމަ ބޮޑު ހުސްކަމެއް އައުމަކީ ދުރުކަމެއްނޫނެވެ. ވުމާއެކު ތައުލީމާއި ތަރުބިއްޔަތުގެ ރޮނގުގައި ދިވެހި ޒުވާނުންގެ އަހައްމިއަޔަތު ނުހަނު ބޮޑު ވެފައި ފުޅަލެވެ. ކަންމިހެން ހުރުމާއިއެކު ޤައުމު ދިރިގެންދަނީ ޒުވާނުގެ ސަބަބުން ކަމާމެދު ޝައްކެއްނެތެވެ.

ހިކި އަނަރޫފަވެފައިވާ ގަހަކުން ކުރެވޭނެ މާބޮޑު ބޭނުމެއް ނޯންނާނެއެވެ. ހަމައެފަދައިން މުސްކުޅިވެ ގައިބާރު ދެރަވެފައިވާ މީހުންނަށް މަސައްކަތްތެރި ކަމުގެ މައިދާނުގައި އަދާކޮށްދެވޭނެ މާބޮޑު މަސައްކަތެއް ނޯންނާނެކަން ކަށަވަރެވެ. މިހަސާބުން މިފަދަ ކަންކަމަށް ވެސް ޤައުމުގެ ޙާލުގެ ދުލުން ގޮވަނީ ޒުވާނުންނަށެވެ. ޒުވާން ސިކުނޑިއާއި ހަރުދަނާ ހިޔާލާއެކު މަސައްކަތް ކުރެވޭނެ ގާބިލް ޤައުމެއް ބިނާކުރުމަށް ޒުވާނުންގެ ބޭނުން ތެރިކަން ބޮޑެވެ. މިސަބަބަށްޓަކައި ދިވެހި ޒުވާނުން ވެގެން ދަނީ ދިވެހި ޤައުމުގެ ދިރުން ކަމުގައެވެ.

ދިވެހި ކާބަފައިންގެ ފަރާތުން އަހަރެމެންނަށް ވާރުތަވެފައިވާ އަގުހުރި އެތައް ހަޒާނާ ތަކެއް މިއަދު ވަނީ ދިރުވާއި އާލާ ކުރަން ޖެހިފައެވެ. ޘަގާފީ ކުޅިވަރުތަކާއި ޘަގާފީ ހެދުންތަކެވެ. ޘަގާފަތާއި އާދަކާދައާއި ދިރިއުޅުމެވެ. މިފަދަ ޘަގާފީ އާދަތައް ދިރުވާ އާލާ ކުރާން ތިބީ އަދުގެ ޒުވާނުން ކަމާމެދަކު ޝައްކެއްނެތެވެ. މިފަދަ ކަންކަމަށް ޤައުމު އަބަދުވެސް ގޮވަނީ ޒުވާން ތަހުޒީބީ ލޭތަކަށެވެ. ކަންމިހެން ހުރުމާއެކު ޒުވާނުންނަކީ ދިވެހި ޤައުމުގެ ދިރުން ކަމުގައި ނިންމަން ޖެހެއެވެ.

ދިވެހި ޤައުމަށް ތާޒާކަމާއި އާރޯކަން ގެނެސްދިނިމަށްޓަކައި ދިވެހި ޒުވާނުންނަކީ ވަރަށް މުހިއްމު އެއް ރުކުން ކަން ކަށަވަރެވެ. އެބަޔަކާ ނުލާ ޤައުމު ގައުމެއްގެ ގޮތުގައި ނޯންނާނެއެވެ. ޤައުމަށް ޢިލްމީ ދަންމަރު ދިއްލާލެވޭނީ ގައުމުގެ ޒުވާނުންނަށް ކަން ޔަޤީނެވެ.  ކުރުގޮތަކަށް ދަންނަވަނީނަމަ ދިވެހި ޤައުމުގެ ރޫހަކީ އަދި ދިރުމަކީވެސް ދިވެހި ޒުވާނުންނެވެ.